پکتیا ولایت کې د ټولنیز خوندیتوب سکتور میاشتنۍ غونډه ترسره شوه
د پکتیا ولایت د کار او ټولنیزو چارو د رئیس قاري محمد رحیم نصرت په مشرۍ، او د مختلفو ولایتي ادارو او همکارو مؤسساتو د استازو په شتون، د ټولنیزو خوندیتوب سکتور میاشتنۍ غونډه ترسره؛ او په کې په مختلفو مواردو بحثونه او پرېکړې وشوې.
غونډه کې د پکتیا ولایت د کار او ټولنیزو چارو رئیس ګډونوالو ته د ښه راغلاست ویلو ترڅنګ یې، د سکتوري ریاستونو ترمنځ د ښې همغږۍ او نږدې اړیکو غوښتنه درلوده. نوموړي زیاته کړه چې غیر دولتي موسسې دې په راتلونکي کال کې خپل فعالیتونه په مساويانه توګه د دې ولایت ټولو ولسوالیو ته وغځوي، چې پدې صورت کې به د افغانستان د اسلامي امارت د اصولو سره سم هغوی سره لازمې همکارۍ وشي.
و رپسې د پکتیا ولایت د اقتصاد رئیس مولوي محمد انور راشد او د ناستې نورو ګډونوالو په خپل وار د تېرې میاشتې د فعالیتونو، لاسته راوړنو او ستونزو په اړه خبرې وکړې او د چارو د ښه پرمختګ لپاره یې هم ځینې وړاندیزونه درلودل.په همدې ترتیب ناسته کې، د روانې میاشتې د کاري استقامتونو او برنامو بحثونه ترسره او په اړه یې پرېکړې وشوې.
