زابل کې دیرش تنو یتیمو او بېسرپرسته ماشومانو سره د ژمنیو توکو مرسته وشوه
د زابل ولایت د کار او ټولنیزو چارو ریاست په هلو ځلو د امارتي روزنتون دیرش تنو ماشومانو ته ژمني توکي ووېشل شول. هغه غونډې ته چې په همدې مناسبت جوړه شوي وه د زابل ولایت د کار او ټولنیزو چارو رئیس مولوي عبدالوکیل خادم په خپلو خبرو کې وویل: دا توکي د کار او ټولنیزو چارو ریاست په نوښت ویشل شوي؛ چې په کښې ۲۰ جوړې موزې، ۶ کوټونه (جاکټونه) او ۷ عدده ګرم بلینونه شامل دي. همدارنګه نوموړي د مرستندویه بنسټونو څخه وغوښتل، چې یادې ادارې سره همکاري پراخه کړي او له یتیمو او بېسرپرستو ماشومانو سره مرستو ته دوام او پراختیا ورکړي.
