د کار او ټولنیزو چارو وزارت تر چتر لاندې؛ پلچرخي کمپ رغېدلو معتادینو؛ چې په بېلا بېلو حرفو کې تر نظري او عملي زده‌کړو ترلاسه کولو وروسته؛ په خپل لاس جوړ کړي تولیدات د افغانستان په نړیوال نندارتون کې نندارې ته وړاندې کړل.

په یاد نندارتون کې د کار او ټولنیزو چارو وزارت اړوند د پلچرخي کمپ د رغېدلو معتادینو د خیاطۍ، بوټ جوړونې، بیک‌ګنډلو او د کورنیو برېښنایي وسایلو د ترمیم په حرفو کې تولیدات شامل دي.

دا په داسې حال کې ده، چې د افغانستان په نړیوال نندارتون کې د ټول هېواد په سطحه د امارتي او غیر امارتې شرکتونو؛ صنعت کارانو، فابریکو او فارمونو هم خپل توکی نندارې ته وړاندې کړل؛ ترڅو سوداګریزې اړیکې پیاوړې، د صادراتو کچه پراخه، نوي پانګوال او مشتریان را جذب، فرهنګي او علمي تجربې پیاوړې کړي او عام خلک له صنعت، کرنې، ټکنالوژۍ، روغتیا او د نورو برخو له تولیداتو او محصولاتو سره بلد کړي.

د یادونې وړ ده، چې په یاد نندارتون کې بهرنیو ننداره چیانو هم ګدون کړی وه؛ چې د جوزا تر یوولسمې به د ټولو هېوادوالو پر مخ پرانېستی وي.