احساس د ټولنيزو خدمتونو مؤسسې سره تفاهم ليک لاسليک شو
دغه تفاهم ليک د څه باندې ۳۶ زره امريکايي ډالرو په ارزښت، کابل ولايت کې ۳۰۰ بې سرپرسته ماشومانو سره د نقدي مرستې په موخه د کار او ټولنيزو چارو وزارت سرپرست وزير ملا عبدالولي څارنوال( حاجي وارث) او احساس د ټولنيزو خدمتونو خيريه مؤسسې استازي روح الله صاحبزاده ترمنځ لاسليک شو.
د ياد تفاهم ليک له مخې، احساس د ټولنيزو خدمتونو خيريه مؤسسه په پام کې لري؛ څو د يادو ماشومانو هر بې سرپرسته ماشوم سره د لس نيم زره افغانيو نقدي مرسته وکړي.
د تفاهم ليک د لاسليک کولو پر مهال د کار او ټولنيزو چارو وزارت سرپرست ملا عبدالولي څارنوال( حاجي وارث) د مؤسسې له مسؤلينو و غوښتل؛ څو ياده نقدي مرسته د کار او ټولنيزو چارو وزارت د استازو په شتون کې توزيع کړي.
په همدې موخه جوړه شوې ناسته کې د احساس ټولنيزو خدمتونو مؤسسې استازي روح الله صاحبزاده وويل، چې ياد ماشومان د يوې شفافې پروسې له لارې احساس خيريه مؤسسې ته معرفي شوي او واقعي اړمن کسان دي. نوموړي ژمنه وکړه، چې ياده نقدي مرسته به د کار او ټولنيزو چارو وزارت استازو سره په همغږۍ وويشي.
