پروان ولايت کې د بې سرپرسته ماشومانو لپاره د ښوونيز کمپليکس د بنسټ ډبره کېښودل شوه.
په همدې موخه د ټولنيزو چارو مرستيال غلام حيدر جيلاني په مشرۍ يو لوړ رتبه هيئت پروان ولايت ته سفر و کړ او د ياد ولايت چارواکو سره تر ليدنې وروسته يې د نوموړي ولايت د بې سرپرسته ماشومانو لپاره د ښوونيز کمپلېکس د بنسټ ډبره کېښوده.
په دې مراسمو کې د ټولنيزو چارو مرستيال غلام حيدر جيلاني د شيخ محمد بن راشد آل مکتوم خيريه بنسټ مسؤلينو څخه د مننې ترڅنګ وويل: له بده مرغه لا هم په هيواد کې ۲۳ ډوله په خطر کې ماشومان لرو، چې يو له هغه هم بې سرپرسته ( يتيمان) ماشومان دي، نوموړي زياته کړه: د کار او ټولنيزو چارو وزارت د يادو ماشومانو ستونزو ته د رسېدو او روزنې برخې کې ژمن دی او تل هڅه کوي، چې د وزارت بودجې او پلان سره سم د ملي او نړيوالو مؤسسو په همکارۍ يادو ماشومانو ته د ساتنې او روزنې برخو کې خدمتونه وړاندې کړي، چې له ښه مرغه دا دی نن د شيخ محمد بن راشد آل مکتوم خيريه بنسټ په مالي مرسته د ښوونيز کمپلېکس د بنسټ ډبرې ايښودو شاهد يو.
ښاغلي جيلاني د بې سرپرسته ماشومانو ښه روزنه او ساتنه د ټولو هېوادوالو ملي رسالت او وجداني مسؤليت ياد کړ، نوموړي په هيوادوالو غږ و کړ؛ څو د ورته بنسټونو د جوړولو چارو څخه څارنه و کړي.
غونډه کې د افغانستان لپاره د شيخ محمد بن راشد آل مکتوم خيريه بنسټ مشر استاد بشير واصل هم خبرې و کړې، نوموړي وويل، چې دغه کمپلېکس به د شپږ سوه او پنځوس زره امريکايي ډالرو په ارزښت په پاخه او اساسي ډول جوړ شي.
استاد واصل زياته کړه، چې ياد کمپلېکس کې به د څلور سوه ماشومانو لپاره ښوونيز تعمير، دوه سوه ماشومانو لپاره د ليلې تعمير، مسجد، څاه، د اوبو ذخيره، ديوال او نور اړين ضروريات بشپړ او تر بشپړېدو وروسته به يې د پروان ولايت د کار او ټولنيزو چارو رياست واک کې ور کړي.
د پروان والي فضل الدين عيار د کابل څخه ورغلي هیئت ته د ښه راغلاست، د کار او ټولنیزو چارو وزارت رهبرۍ او شيخ محمد بن راشد آل مکتوم خيريه بنسټ څخه د مننې ترڅنګ زیاته کړه، د خوښۍ ځای دی، چې د پروان ولايت د شته روزنتون تر څنګ د بې سرپرسته ماشومانو لپاره د بل تعليمي کمپلېکس د جوړېدو سهميه هم ور کړل شوې ده، نوموړي ژمنه و کړه، چې د پروان ولایت ولس او سیمه ایزه اداره به د یاد کمپلېکس او بې سرپرسته ماشومانو په ښه روزنه او ساتنه کې زیاته هڅه و کړي.
غونډه کې د پروان ولايت ولايتي شورا او علماوو شورا مشرانو او مدني ټولنې استازي هم خبرې و کړې او د ياد کمپلېکس د جوړيدو او بې سرپرسته ماشومانو برخه کې يې د کار او ټولنيزو چارو وزارت له پاملرنې مننه و کړه.
د ویلو دی، چې اوس مهال هیواد کې ۶۷ دولتي او خصوصي روزنتونونه فعالیت لري، چې شا او خوا لس زره بې سرپرسته ماشومان په کې ساتل او روزل کیږي
