د بې وزله، یتیمو او بې سره پرسرسته ماشومانو څخه د ملاتړ ورځ و نمانځل شوه.
د کار او ټولنیزو چارو وزارت له خوا د یتیمو او بې سرپرسته ماشومانو څخه د ملاتړ او لاسنیوي په موخه علاوالدین روزنتون شاګردانو ته د روژه ماتي غونډه جوړه شوه.
په غونډه کې د کار او ټولنیزو چارو مرستیالانو، د مشرانو جرګې د معارف، تحصیلاتو او دینې چارو کمیسیون رئيس، د یو شمیر خصوصي پوهنتونو مشرانو، د چارو ادارې فرهنګی رئيس، د کار او ټولنیزو چارو یو شمیر رئیسانو، د روزنتونونو شاګردانو او مربیانو ګډون کړی وه.
په غونډه کې د کاري چارو مرستیال سید عبدالکریم هاشمي، د ټولنیزو چارو مرستیال غلام حیدر جیلانی او یو شمیر نورو خبرې و کړې، پر مرسته کوونکو ادارو او ټولو هیوادوالو یې غږ و کړ، څو د یتیمو او بې سرپرسته ماشومانو لاسنیوی و کړي.
د کار او ټولنیزو چارو رهبرۍ مسؤلینو د ترکیې هیواد اړوند هلال احمر ادارې څخه مننه و کړه، چې وخت په وخت د دې یتیمو او بې سرپرست ماشومانو لاسنیوی کوي او هیله یې څرګنده کړه، څو په راتلونکي کې هم د یتیمو او بې سرپرسته ماشومانو سره خپلې مرستې جاري و ساتي.
د روژه ماتي دغه پروګرام د ترکیې هیواد هلال احمر ادارې له خوا برابر شوی وه، چې په پای کې د اسلامیک ریلیف مؤسسې له خوا هم د روزنتون پر شاګردانو رمضاني ډالۍ و ویشل شوې.
د ویلو دی، چې اوس مهال په هیواد ۶۵ خصوصي او دولتي روزنتونونه فعالیت لري او لس زره ماشومانو یتیمو او بې سرپرسته ماشومانو ته خدمتونه وړاندې کوي.
