لوګر کې ۶۰ تنه د فني او حرفوي زدهکړو څخه فارغ شول
د لوګر ولایت د کار او ټولنیزو چارو ریاست اړوند د فني او حرفوي زدهکړو له مرکز څخه ۶۰ تنه زدهکوونکي د ودانیو برېښنا او موبایل جوړولو رشتو کې تر شپږ میاشتنیو نظري او عملي زدهکړو وروسته فارغ شول.
په همدې مناسبت جوړه شوې غونډه کې چې د ولایت مختلفو اداري مسؤلینو، علمای کرامو او ځایي خلکو حضور درلود؛ د لوګر ولایت د کار او ټولنیزو چارو رئیس مولوي جان محمد طلحه په خپلو خبرو کې فارغ شوو زدهکوونکو ته د مبارکۍ ترڅنګ وویل: د کار او ټولنیزو چارو وزارت تل په دې هڅه کې دی، چې هېوادوالو په ځانګړې توګه ځوان قشر ته د زدهکړو او مناسبو کاري فرصتونو زمینه برابره کړي. همدې موخې ته د رسېدو په منظور یې د مرکز په ګډون په مختلفو ولایتونو کې بېلا بېل پروګرامونه او روزنیزې دورې په لار اچولې دي، چې په تطبیق سره به یې د ډېرو هېوادوالو ټولنیزې ستونزې تر یوه حده را ټیټې شي.
ورپسې د لوګر ولایت مرستیال مولوي محمد انور دینپرور په خپله لنډه وینا کې فارغو شویو زدهکوونکو ته د مبارکۍ سربېره زیاته کړه: د کار او ټولنیزو چارو وزارت د هېواد د کار بازار تر ژورې مطالعې وروسته په خپلو مراکزو کې هېوادوالو ته د بازار اړتیاوو ته په کتو د فني او حرفوي زدهکړو زمینه برابروي.
مولوي محمد انور دینپرور همدارنګه وویل: فارغ شوي زدهکوونکي باید عملاً د کار بازار کې د خپلو حرفو اړوند خپلو هېوادوالو ته ګټور او اغېزمن خدمات وړاندې کړي.
