لوګر ولایت کې د روزنتون او فني او حرفوي زدهکړو د مرکز پرانیسته وشوه
د کار او ټولنیزو چارو وزارت، لوړ پوړي پلاوي لوګر ولایت ته پخپل سفر کې، د پټۍ په پرېکولو سره د دې ولایت د روزنتون او د فني او حرفوي زدهکړو مرکز پرانیستل.
هغه ناسته چې په همدې مناسبت د لوګر ولایت د کار او ټولنیزو چارو ریاست کې جوړه شوې وه، د ولایت مرستیال مولوي عنایتالله شجاع مېلمنو ته د ښه راغلاست ترڅنګ، د یتیمو او بېسرپرسته ماشومانو او فني او حرفوي زدهکړو ته د رسیدنې او پاملرنې له امله یې د کار او ټولنیزو چارو وزارت د ښې رهبرۍ څخه په مننې سره وویل: هېواد کې د ډاډمن امنیت په ټینګښت سره هره برخه کې د خدماتو د وړاندې کولو فرصت برابر شویدی چې باید له دې څخه په استفادې؛ خپل مسؤلیتونه او مکلفیتونه ادا او د خپلو خلکو د حقه حقوقو د تأمین لپاره لازمې هڅې وکړو.
په همدې ترتیب د کار او ټولنیزو چارو وزارت د ټولنیزو چارو معین شیخ عبدالبر خپله وینا کې څرګنده کړه: وزارت هوډ لري چې پرته له هېڅ توپير او سلیقوي چلنده ۳۴ ولایتونو کې د روزنتونونو په فعالولو سره، یتیمو او بېسرپرسته ماشومانو ته د تعلیم او تربیې د زمینې سربېره د ژوندانه نور سهولتونه هم برابرکړي، چې لوګر ولایت یې بېلګه ده او د سهمیې مطابق به د دې ولایت روزنتون ته ۲۵۰ تنه هلکان او انجونې جذب شي.
و رپسې د کار چارو معین مولوي محمد زاهد جان آغا، پهداسې حال کې چې د وزارت د داخلي تفتیش رئیس ملا شرفالدین شرف هم حضور درلود؛ خپلو خبرو کې وویل: د بېکارۍ کچې د ټيټېدو لپاره هڅې روانې دي او ترڅنګ یې غواړو چې د فني او حرفوي زدهکړو له لارې ځوانانو ته د کاریابۍ زمینې برابرې او هغوی د کار په بازار کې شامل کړو. مولوي محمد زاهد جان آغا زیاته کړه اوسمهال ټول هېواد کې ۵۲ د فن او حرفو مرکزونه فعال او د کار بازار د اړتیاوو مطابق په کې ۷۵ رشتې تدریس کیږي او هرکال تر۲۰ زرو ځوانان له دې مراکزو د فراغت سندونه ترلاسه کوي. نوموړي وویل د دې برخې د لا پیاوړتیا په موخه د راتلونکي لپاره ۳۷۰ میلیونه افغانۍ بودجه په پام کې نېول شوې او ټولو مراکزو ته رسمي استادان استخدام شویدي او هم به د لوګر ولایت د فن او حرفې مرکز چې د اوس لپاره په کې د مبایل او د تعمیراتو د برق حرفې تدریس کیږي، د جذب ظرفیت لوړ او دې مرکز کې به د اوو رشتو تدریس پیل شي او دې برخه کې شته کمبوداتو ته به رسیدګي وشي.
په پای کې د کار او ټولنیزو چارو وزارت پلاوي د لوګر ولایت د مرستیال والي او ځینو نورو ادارو د استازو په شتون سره؛ د دې ولایت د کار او ټولنیزو چارو ریاست اړوند روزنتون او د فني او حرفوي زدهکړو مرکز د پټۍ په پرېکولو سره پرانیستل.
