ننګرهار ولایت کې د ټولنیزخوندیتوب سکتور میاشتنۍ ناسته ترسره، او څلور تنه ماشومان له خپلو کورنیو سره یوځای شول
د ننګرهار ولایت د کار او ټولنیزو چارو د رئیس مولوي فریدالله حقاني په مشرۍ، او د اړونده ادارو او مؤسساتو د استازو په حضور کې، د ټولنیزو خوندیتوب سکتور میاشتنۍ ناسته ترسره شوه.
ناسته کې د ټولو ادارو او مؤسساتو ترمنځ په نږدې همغږۍ د ټینګار سربېره؛ له پاکستان هېواد څخه د بېرته راستنېدونکو کډوالو لپاره د خدماتو په وړاندې کولو کې لومړیتوبونه مشخص او د راتلونکې میاشتې د فعالیتونو او کاري استقامتونو په اړه هم پرېکړې وشوې.
د یوبل خبر له مخې د ننګرهار ولایت د کار او ټولنیزو چارو ریاست څلور تنه هغه ماشومان چې د ایران هېواد څخه رد مرز شوي وو، خپلو کورنیو ته وسپارل.
یاد څلور تنه ماشومان چې د ننګرهار ولایت د غنيخېلو، خوږیاڼو او شېرزاد ولسوالیو اصلي اوسېدونکي وو، د نقدي مرستې د ترلاسه کولو وروسته ، د دې ولایت د کار او ټولنیزو چارو ریاست لخوا یادو ولسوالیو ته انتقال او هلته خپلو کورنیو ته وسپارل شول.
