تورخم او سپین بولدک کې بېرته راستنېدونکو کډوالو ته د خدماتو وړاندې کولو بهیر روان دی
د افغانستان اسلامي امارت له لوري بېرته راستنېدونکو کډوالو ته د خدماتو د تنظیم کميټې سره په همغږۍ او د کار او ټولنیزو چارو سرپرست وزیر الحاج ملا عبدالمنان عمري د هدایت په اساس، د ننګرهار ولایت په تورخم ښارګوټي او د کندهار ولایت په سپین بولدک کې د دې وزارت مېشتو تخنیکي ټیمونو د خپلو تېرو فعالیتونو په دوام؛ پرون چهارشنبه ۴۵۳تنه بېرته راستنېدونکي هېوادوال سیستم کې ثبت او په اړونده برخو کې یې هغوی ته لازم خدمات وړاندې کړل.
د کار او ټولنیزو چارو وزارت د تخنیکي ټیمونو په وینا دوی توانیدلي چې تېره ورځ د ننګرهار ولایت په تورخم ښارګوټي کې ۳۲۶تنه او د کندهار ولایت په سپینبولدک ولسوالۍ کې ۱۲۷تنه بېرته راستنېدونکي کډوال سیستم کې ثبت کړي، او هم د روغتیايي خدماتو، د ترانسپورت د تنظیم، د زیانمنو اقشارو څخه د ملاتړ او د مشاورو او عامه پوهاوي په برخو کې کډوالو ته اړین خدمات وړاندې کړي.
