روزنتونونو ته د ترکيې جمهوري هيواد د مرستو ويش
دغه کمکي بستو کې چې غذايي مواد او قالينې شاملې وې؛ د يو لړ مراسمو په ترڅ کې د دوست هيواد ترکيې د سفير له لوري د افغانستان روزنتونو ته ور کړل شوې.
دې پروګرام کې د کار او ټولنيزو چارو وزارت سرپرست ملا عبدالولي څارنوال( حاجي وارث) د افغانستان لپاره د ترکيې هيواد سفير جحات ارګينای، د ترکيې هيواد د مرستو همغږې کوونکې ادارې (TEKA ) مشر، د روزنتونونو عمومي رئيس فيضان احمد کاکړ، د وزارت مقام د ټولنيزو چارو سلاکار رياض احمد محمد، د ترکيې سفارت او کار او ټولنيزو چارو وزارت يو شمير کارکوونکو ګډون کړی وه.
د مرستو د ويش دغه پروګرام د قران کريم په مبارکو ايتونو پيل شو، چې وروسته د کار او ټولنيزو چارو وزارت سرپرست ملا عبدالولي څارنوال( حاجي وارث) خبرې وکړې او په تيرو اتو مياشتو کې يې د دوست هيواد ترکيې له بشري مرستو مننه وکړه؛ زياته يې کړه: تيرو ۴۰ کلونو جنګونو کې ګڼ شمير افغان ميرمنې ګونډې او ماشومان يتيمان شوي، چې دغه بشري مرستې لا هم کافي نه دي؛ نوموړي د دوست هيواد ترکيې څخه و غوښتل؛ څو افغانستان کې پانګونه وکړي او په افغانستان کې لويې پروژې پلې کړي؛ څو له همدې لارې په هيواد کې د بيوزلۍ کچه کمه او کارموندنه را منځ ته شي.
د افغانستان لپاره د دوست هيواد ترکيې سفير په خپلو خبرو کې وويل: ترکيې په تيرو اتو مياشتو کې ۵۰۰۰ ټنه بشري مرسته د اوسپنې پټلۍ له لارې افغانستان ته را ليږلې، چې ۳۴ ولايتونو کې ويشل شوې، چې د يادو مرستو د ويش په لړ کې دا دی ۱۵۰۰ خوراکي کمکي بستې او ۷۵۰ تختې قالينې روزنتونونو سره مرسته و شوه.
د ترکيې سفير وويل: په تيرو پنځو کلونو کې يې د روزنتونونو په برخه کې زياتې مرستې کړي، چې په مرکز او ولايتونو کې د روزنتونونو د تعميرونو بيا رغوونه، په روزنتونونو کې د پارکونو جوړول، د اختريزو او روژه ماتي پروګرامونو جوړل او د يتيمو ماشومانو لپاره د روغتيايي او خوراکي موادو ويش د دوی له مهمو مرستو څخه شميرل کيږي.
د ويلو دی، چې د ترکيې هيواد دغه مرستې به د تهيه مسکن روزنتون سربيره د هيواد نورو روزنتونونو کې هم و ويشل شي.
