د کاري چارو نوی مرستیال، د کار او ټولنیزو چارو وزیر له خوا معرفي او رسما یې په کار پيل وکړ.
د کار او ټولنیزو چارو وزارت په وړاندیز او د جمهوري ریاست عالي مقام په منظورۍ؛ ښاغلی عبدالغفور ملکزی د کار او ټولنیزو چارو وزارت د کاري چارو نوي مرستیال په توګه معرفي او رسما یې په کار پيل وکړ.
په همدې موخه جوړه شوې ناسته کې د کار او ټولنیزو چارو وزیر بشیر احمد ته ینج د خپلو خبرو په ترڅ کې، کار معینیت د دې وزارت یو مهم معینیت یاد کړ، و یې ویل: د کار معینیت لکه څنګه چې له نوم څخه یې روښانه ده، زیات مسؤلیت یې د کار او کارګرو اړوند دی؛ همدارنګه اوس مهال د کاري فرصتونو را منځ ته کولو برخه کې د دې وزارت په ځانګړې توګه د کار معینیت د یوې مهمې برنامې( بهر ته د کارګرو لیږولو پروګرام) مسؤلیت په غاړه لري. نوموړي زیاته کړه: ژمن یو، چې د کار معینیت د نوې رهبرۍ په راتګ سره به د کار او کارګرو د حقوقو خوندیتوب برخه کې لا زیاتې هڅې وکړو.
ښاغلي ته ینج د خپلو خبرو په ترڅ کې د کاري چارو نوي مرستیال ته د مبارکۍ ترڅنګ نوموړي ته په چارو کې د بریالیتوب هیله وکړه.
د کاري چارو نوي مرستیال عبدالغفور ملکزي بیا د خپلو خبرو په ترڅ کې د کار او ټولنیزو چارو وزارت رهبرۍ او ولسمشر له باور څخه مننه و کړه، و یې ویل: لکه څنګه چې هره اداره کې ستونزې او فرصتونو شته، خو له خپل کاري ټیم سره به هڅه و کړم، چې له شته فرصتونو څخه په ګټنې په ګډه ستونزې حل کړو.
نوموړي په ادارو کې د همغږۍ نشتوالی د فساد لوی عامل یاد کړ او ژمنه یې و کړه، چې د وزارت رهبرۍ او خپل کاري ټیم سره به په ښه همغږۍ چارې مخته یوسي.
د ویلو دی، چې ښاغلی عبدالغفور ملکزی له دې وړاندې د بادغیس او نورستان والي وه.
