د کار او ټولنیزو چارو سرپرست وزیر د GIZ موسیسې تخنیکي همکاریو رییس سره وکتل.

د کار او ټولنیزو چارو سرپرست وزیر ښاغلی بشیر احمد ته ینج د آلمان هیواد؛ GIZ پروژې د کار بازار له اړتیاوو سره سم د مهارتونو پراختیا د تخنیکي همکاریو له رییس ښاغلی مارک ونسټین کیسټی سره ولیدل.

په لیدنه کې د کار او ټولنیزو چارو سرپرست وزیر د مهارتونو پراختیا او همدا شان د فني او حرفوي زده کړو په ډګر کې د GIZ له تلپاتو همکاریو څخه مننه وکړه، و يې ویل: مونږ په راتلونکې کې هم هیله لرو چې نه یوازې د GIZ مرستې ادامه پیدا کړي بلکې دا موسسه د کار او ټولنیزو چارو وزارت او نورو نړیواله مرستندویه موسیساتو ترمنځ د نور همکاریو جلب په موخه د پل په حیث کار وکړي.

ورپسې د GIZ پروژې د کار بازار له اړتیاوو سره د مهارتونو پراختیا د تخنیکي همکاریو رییس مارک ونسټین کیسټی وویل چې GIZ په پام کې لري ترڅو په نږدې راتلونکې کې د کار او ټولنیزو چارو وزارت لپاره د ستراتیژیک پلان جوړولو، پالیسیو پراختیا او د یاد وزارت پروګرامونو بهتروالی په موخه، د نورو هیوادونو بریالیو تجربو څخه د ګټې اخیستې لپاره؛ د نورو هیوادونو د کار او ټولنیزو چارو وزارت پخوانیو او باتجربه وزیرانو او همدا شان د کار او حرفې په ډګر کې نړیوالو ماهرینو په ګډون په دبۍ ښار کې درې ورځنی کنفرانس په لاره واچوي چې په یاد کنفرانس کې د کار او ټولنیزو سرپرست وزیر ګډون هم اړین ګڼل کیږي.

همدارنګه ښاغلي ونسټین د فني او حرفوي زده کړو مرکزونو څخه د بهتره ملاتړ یادونه وکړه او وویل چې فني او حرفوي زده کړې په یو هیواد کې د غیرې قانوني ګډوالۍ څخه مخنیوی کوي او په همدې موخه به GIZ په نږدې راتلونکې کې ۱۵۰۰۰ جلده د فن او حرفې کتابونه چاپ او په یادو مرکزونو وویشي.

په پای کې د کار او ټولنیزو چارو سرپرست وزیر ښاغلی بشیر احمد ته ینج ژمنه وکړه چې شرایطو ته په کتو؛ GIZ سره په همغږۍ به د یاد کنفرانس نیټه مشخصه او په یاد اړین کنفرانس کې به ګډون وکړي.