دوه مرسته کوونکو بنسټونو سره هوکړه لیکونه لاسلیک شول.
د کار او ټولنیزو چارو وزارت او راتلونکې هیلې خیریه بنسټ ( نهاد خیریه آرزوی آینده ـ FHCO ) تر منځ د یتیمو او بې سرپرسته ماشومانو د مرستې او همکارۍ په موخه هوکړه لیک لاسلیک شو.
د راتلونکي هیلې خیریه بنسټ(FHCO) له شپږ میاشتو را په دې خوا د کابل لسمه ناحیه کې یو روزنتون جوړ کړی، چې د ۵۰ تنه یتیمو او بې سرپرسته ماشومانو ظرفیت لري، چې اوس مهال په کې ۴۰ تنه یتیم او بې سرپرسته ماشومان ژوند کوي، چې خصوصي مکتبونو کې ورته د ښونې او روزنې تر څنګ د ژوند ښه امکانات هم برابر شوي دي.
د راتلونکې هیلې بنسټ (FHCO) مشر سره د هوکړه لیک د لاسلیک کولو پر مهال د ټولنیزو چارو مرستیال غلام حیدر جیلاني وویل: موږ باید الله ج سره عهد و لرو او د هیوادوالو د خدمت په ځانګړې توګه یتیم او بې سرپرسته ماشومانو ته چې د ټولنې متضرره قشر دی، باید صادقانه کار او مرسته و کړو.
د راتلونکې هیلې خیریه بنسټ (FHCO) مشر فردین حمید بها، د خپلو خبرو په ترڅ کې یاد بنسټ کې ماشومانو ته د ښو برابرو شویو اسانتیاوو اړوند خبر ور کړ او په دې برخه کې یې د لا زیاتې همکارۍ ژمنه و کړه.
همدارنګه یو خصوصي وړکتون ( مادر وړکتون) مسؤلینو سره هم هوکړه لیک لاسلیک شو. دغه وړکتون کندز ولایت کې فعالیت لري، چې د ۴۰ تنه ماشومانو ظرفیت لري او هغه ماشومان چې والدین یې بې بضاعته او یا هم په مخدره توکو روږدي وي، تر پوښښ لاندې نیسي.
