پکتیا ولایت ته د کار چارو معین سفر
د کار او ټولنیزو چارو وزارت معین الحاج مولوي محمد زاهد احمدزي، پکتیا ولایت ته د خپل رسمي سفر په ترڅ کې په یوه ستره ولسي غونډه کې ګډون او وینا وکړه.
غونډه کې چې د محلي ادارې ځینو مسؤلینو، علمای کرامو، قومي مخورو او ځوانانو ګډون درلود؛ د پکتیا مرستیال والي مولوي انعامالله صلاحالدین مېلمنو ته ښه راغلاست ووایه او په دې ولایت کې یې د ځینو پروژو د تطبیق او په کې د خلکو د بوختیا څخه په یادونې سره وویل: له نېکمرغه د پکتیا ولایت د ادارو ترمنځ ښه همغږي موجوده او ټول مسؤلین هڅه کوي، ترڅو اړونده برخو کې د دې ولایت اوسېدونکو ته بهتره خدمات ورسوي، چې په همدې لړۍ کې ۲۱۲ مختلفې پراختیايي پروژې تطبیق شوي، ۳ زرو تنو ته په شاروالۍ کې د کار زمینه برابره شوې او د سیلابونو د مخنیوي په موخه د یو میلیون ډالرو په ارزښت د استنادي دیوالونو د جوړولو پروژه هم تر کار لاندې ده.
په همدې توګه د علماوو د شورا رئیس شیخ احمد جان خپلو خبرو کې د افغانستان اسلامي امارت له لوري بنسټیزو پروژو ته د لومړیتوب ورکولو او مختلفو برخو کې د لاسته راوړنو څخه په مننې سره، د اسلام مبارک دین له نظره د کسب او کار پر اهمیت رڼا واچوله او له مسؤلینو یې وغوښتل، چې ځوان نسل ته د کاري فرصتونو د برابرولو په موخه خپلې هڅې ګړندۍ کړي.
همداراز قومي مشر حاجي جهاني هم په خپله لنډه وینا کې په ټول هېواد کې د بشپړ امنیت د تأمین او د مهمو ملي او اقتصادي پروژو له تطبیق څخه، چې دمګړۍ په کې ګڼ شمېر خلکو ته کاري فرصتونه برابر دي په نیکۍ یادونه وکړه او هیله یې و ښوده، چې د کار او ټولنیزو چارو وزارت له لوري دې له هېواد بهر د افغان ماهرو کاریګرو د اعزام پروسه تعقیب شي.
په پای کې د کار چارو معین مولوي محمد زاهد احمدزي خپلو خبرو کې څرګنده کړه: د افغانستان اسلامي امارت په ټول توان کار کوي، چې ستونزې په فرصت بدلې او د وخت او خپلو ولسونو اړتیاوو ته په کتو ورڅخه معقوله او مناسبه ګټه واخلي، چې هم هېواد د پرمختیا مسیر ته برابر شي او هم مو خلکو ته د لازمې هوساینې زمینه برابره شي او په همدې موخه یې د ملي منافعو په پام کې نیولو سره؛ د سیمي او ګاوڼد له هېوادونو سره یې ښې رسمي او سوداګریزې اړیکې جوړې کړي او د دې اړیکو د پراخېدو په موخه به نور اقدامات هم ترسره شي.
مولوي محمد زاهد احمدزي د خپلو خبرو په دوام وویل: د بیکارۍ ستونزه په هېواد کې شته خو په وړاندې یې د مبارزې په موخه د کار او ټولنیزو چارو وزارت لازمې هڅې کوي، ترڅو هېوادوالو ته نوي کاري فرصتونه برابر شي او هم کاري شرایط بهبود پیدا کړي، ترڅنګ یې د کار قانون د توشیح مرحلې ته رسیدلی، چې په توشیح سره به یې د کاریګرو حقوق تأمین او د کار په برخه کې موجودې ځینې ستونزې حل شي. په پای یې کې ډاډ څرګند کړ، چې د پکتیا د ولسونو ستونزې او غوښتنې به د حل به موخه له اړونده مسؤلینو سره شریکوي
