د مالي او اداري چارو مرستیال د فراه او جوزجان ولایتونو د کار او ټولنیزو چارو د رئیسانو کاري راپورونه واورېدل
د کار او ټولنیزو چارو وزارت مالي او اداري مرستیال مولوي دینمحمد حقبین په جلا جلا ناستو کې د فراه او جوزجان ولایتونو د کار او ټولنیزو چارو رئیسانو کاري فعالیتونه او راپورونه واورېدل او د چارو د ښه تنظیم په موخه یې ځینې سپارښتنې وکړې.
ناستو کې د فراه ولایت د کار او ټولنیزو چارو رئیس مولوي شېر احمد حقطلب او د جوزجان ولایت د کار او ټولنیزو چارو رئیس حافظ نورالله مسافر د خپلو اړونده ریاستونو لاسته راوړنې، پرمختګونه، خلکو ته د خدماتو د وړاندې کولو او هم ځینو ستونزو په اړه د کار او ټولنیزو چارو وزارت مالي او اداري مرستیال سره معلومات شریک او د ستونزو د حل په موخه یې د وزارت د مشرتابه غوښتنې درلودې.
ورپسې د کار او ټولنیزو چارو وزارت مالي او اداري مرستیال مولوي دینمحمد حقبین خپلو خبرو کې څرګنده کړه چې د وزارت اړوند ټول ولایتي ریاستونه دې هېوادوالو په ځانګړې توګه زیانمنو اقشارو ته د خدماتو په وړاندې کولو کې هېڅ راز هڅې نه سپموي. مولوي دینمحمد حقبین د دې ترڅنګ چې ځینو شته ستونزو د رسیدګۍ په اړه یې ډاډ ورکړ، د چارو د ښه پرمختګ په اړه یې هم ځینې سپارښتنې وکړې.
