د کار او ټولنيزو چارو وزارت سرپرست وزير سره د هاجر مؤسسې د رئيس ليدنه
د کار او ټولنيزو چارو وزارت سرپرست وزير ملا عبدالولي څارنوال( حاجي وارث) د افغانستان لپاره د هاجر مؤسسې اجرائيوي مشر (جان دي وال) سره خپل کاري دفتر کې وکتل.
په دې تعارفي ليدنه کې چې د کار چارو مرستيال مولوي مخدوم عبدالسلام سعادت سربيره د وزارت مقام د دفتر رئيس مولوي شرف الدين شرف، د روزنتونونو عمومي رئيس فيضان احمد کاکړ، د ماشومانو سکرتريت رئيس مولوي عبدالعزيز او د ټولنيزو تأميناتو رئيس شريف الله شرافت هم برخه لرله، په کې د مختلفه ګټګوريو ماشومانو ستونزو ته د رسيدو اړوند خبرې و شوې.
د کار او ټولنيزو چارو وزارت سرپرست وزير ملا عبدالولي څارنوال( حاجي وارث) د هاجر مؤسسې له همکارۍ څخه د مننې ترڅنګ د يادې مؤسسې له مشر څخه و غوښتل؛ څو د ماشومانو او د کار او ټولنيزو چارو وزارت اړوند نورو برخو کې د خپلې همکارۍ ترڅنګ نورې مرسته کوونکې او همکارې ادارې هم تشويق کړي؛ څو د افغانستان په اوسنيو شرايطو کې له افغان ماشومانو سره مرسته او همکاري وکړي.
نوموړي وويل، چې د ا.ا په ځانګړې توګه د کار او ټولنيزو چارو وزارت تل ژمن دی، چې له ورته همکارو ادارو سره به د پروژو تطبيق برخه کې د يو دولتي ادارې په صفت ښه همکاري کوي.
ملا عبدالولي څارنوال( حاجي وارث) د هاجر مؤسسې او د هغوی له لارې د نورو همکارو نهادونو پر استازو غږ وکړ؛ څو د خپلو پروژو د تطبيق برخه کې د ښاري سيمو ترڅنګ؛ کليوالو سيمو ته زيات لومړيتوب ورکړي؛ ځکه کليوالې سيمې په تيرو شل کلونو کې له هر ډول مرستو او خدمتونو څخه محرومې وې.
د کار چارو مرستيال مولوي مخدوم عبدالسلام سعادت د خپلو خبرو په ترڅ کې د ماشومانو د ښې روزنې پر ارزښت خبرې وکړې و يې ويل، چې د ماشومانو په روزنه کې بايد ډير دقيق اوسو؛ ځکه ماشومان د ټولنې راتلونکي دي او بايد د ټولنې د ښه پرمختګ او هيواد د ښې راتلونکې په موخه د هيواد ټولو ماشومانو ته رسيده ګي وکړو، چې په دې برخه کې د حکومت ترڅنګ همکاره او مرسته کوونکې ادارې هم بايد خپل اسلامي او شرعي مسؤليت ادا کړي.
د افغانستان لپاره د هاجر مؤسسې اجرائيوي مشر ( جان دي وال) وويل، چې دوی د ماشومانو د ښې راتلونکې په موخه کار کوي او تر دې مهاله يې په افغانستان کې ګڼ شمير متضرر او اړمن ماشومان تر پوښښ لاندې نيولي او ژمن دي، چې د ماشومانو برخه کې د خپلو امکاناتو په محدوده کې لا زياته همکاري وکړي.
د ويلو دی، چې هاجر مؤسسه د کار او ټولنيزو چارو وزارت اړوند د کارته سه (د ذهني تأخير لرونکو ماشومان مرکز) سره همکاري لري او په نږدې راتلونکي کې به تر يو لړ خبرو وروسته ورسره د ښې همغږۍ او همکارۍ دوه اړخيز هوکړه ليک هم لاسليک کړل شي.
