افغان جايکا د فني او حرفوي زده کړو مرکز ته د لارموندنې په موخه کانکور آزموينه واخيستل شوه
د د دولسم صنف د څه باندې درې سوه تنه فارغانو څخه چې د افغان ـ جايکا د فني او حرفوي زده کرو مرکز ته د لار موندنې په موخه يې نوم ليکنه کړې وه؛ نن ورڅخه د کانکور ازموينه واخيستل شوه، چې له دې ډلې به ۱۲۰ تنه د ياد مرکز کمپيوټر او تعميراتي برق څانګو کې جذب شي.
په همدې موخه جوړه شوې غونډه کې د کار چارو مرستيال مولوي مخدوم عبدالسلام سعادت؛ شاګردان ښو او مسلکي زده کړو ته تشويق او په چارو کې يې ورته د بريا هيله وکړه.
مولوي مخدوم زياته کړه، چې د کار او ټولنيزو چارو وزارت د کاري چارو د تنظيم د يو مسؤل وزارت په توګه هڅه کوي؛ څو له مختلفو لارو چارو په کور دننه او بهر کارګرو ته د کار زمينه برابره کړي. نوموړي وويل، هڅه کوي؛ څو له هيواده بهر هم د افغان کارګرو ستونزو ته د حل لارې چارې پيدا او د يو رسمي ميکانيزم له لارې ورته رسيده ګي وکړي.
د مالي او اداري چارو مرستيال مولوي دين محمد حقبين بيا د خپلو خبرو په ترڅ کې وويل: کسب لرونکی شخص د الله ج دوست دی او کسب د ټولنې مهمه اړتيا ده او هغه کسان چې د فني او حرفوي زده کړو له لارې ځان، کورنۍ او هيواد ته خدمت کوي؛ هم د الله ج دوستان دي.
نوموړي د ازموينې له ګډونوالو و غوښتل؛ څو په ښه توګه خپل درسونه تعقيب او ټولنې ته د خدمت مصدر و ګرځي.
د ويلو دی، چې د افغان ـ جايکا د فني او حرفوي زده کړو مرکز لپاره د کانکور ازموينې او د ياد مرکز له تدريسي محيط څخه د کار او ټولنيزو چارو وزارت سرپرست ملا عبدالولي څارنوال( حاجي وارث) هم ليدنه وکړه او د لا ښه نظم او تدريس په موخه يې اړوندو مسؤلينو ته لازمې سپارښتنې او لارښوونې وکړې.
