د سیګار وروستي راپور په اړه د کار او ټولنیزو چارو وزارت مطبوعاتي اعلامیه

ټولو ته څرګنده ده چې په افغانستان کې د امریکا او د هغې لویدیځو متحدینو ګوډاګي نظام له پرځیدو او اسلامي امارت له بریالیتوب وروسته؛ د امریکا متحده ایالاتو د خپلې ماتې جبران لپاره هڅه وکړه چې د خپلو اسعاري زیرمو ته د افغانستان بانک لاسرسي بنده کړي چې د امریکا او د هغې د متحدینو دا غیرانساني عمل د دې سبب شو چې تمویل کوونکي هیوادونه؛ افغانستان سره د مرستې لپاره خپلې کړې ژمنې وځنډوي؛ دا اقدامات د دې سبب شول چې د کار، ژوند او هوساینې ټولنیز شرایط اغیزمن او همداشان د هیواد د کاربازار تر یو حده پورې له ستونزې سره مخ کړي.
په هیواد کې د بیکارۍ کچې ټیټوالی او د ځان بسیاینې په موخه له څه مودې راهیسې د افغانستان اسلامي امارت لوی پروګرامونه او سترې اقتصادي پروژې لکه: د قوش تیپې د اوبو بند جوړیدلو پرانستل، د شمال حوزې د معادینو راسپړل، د ټاپي پروژې د عملي کار پیلیدو لپاره د آسانتیاوو رامنځته کول، د کورنیو او بهرنیو پانګه اچوونکو د امنیت خوندیتوب او په هیواد کې د پانګې اچونې لپاره د هغوی هځول، په هیواد کې د خصوصي سکتور څخه ملاتړ او په همدې توګه لسګونې نور پروګرامونه او پروژې چې په هیواد کې به د کارپیداکولو ستر فرصتونه منځته راوړي؛ ترلاس لاندې نیولي دي چې په راتلونکې کې به موږ د هیواد د اقتصاد غوړیدو او هیوادوالو ته د زیاتو کاري فرصتونو رامنځتو کیدو شاهدان اوسو.
په هیواد کې د کارګر او کارفرما ترمنځ د اړیکو تنظیم کوونکی او همدارنګه د کارپنځونې او بیکارۍ د کمښت د بنسټ په توګه لاندې طرحې او پروګرامونه ترلاس لاندې لري: 
1-    د ګدايي د مخنیوي او د ګدایانو راټولولو طرح؛
2- په نشه يي توکو د روږدو کسانو راټولو او له تداوی وروسته هغوی ته فني او حرفوي زده کړو زمینې برابرولو طرح؛
3- د هیواد ځمکنیو بندرونو او هوایي ډګرونو ته د بهرنیو اتباعو د کار جواز د ویش ریاست د فعالیت غځیدو طرح؛
4- د هیواد څخه د افغان کارګرانو د حقوقو د دفاع طرح؛
5- د هغو کسانو لپاره د ډیټابیس جوړولو طرح چې فني او حرفوي زده کړې یې کړي دي او لاتراوسه بیکاره دي.
6- د کاربازار له اړتیاوو سره سم د فنی او حرفوي زده کړو ارایه کولو طرح؛
7-  په ټول هیواد کې د کار او ټولنیزو چارو وزارت د کارکوونکو لپاره د ظرفیت لوړولو پروګرام د غځولو طرح؛
8-  د کار پنځولو او بیکارۍ کمولو لپاره هراړخیزه او بنسټیزه طرح؛
9- د کورنیو او بهرنیو مرستندویه بنسټونو د ملاتړ جلبولو طرح؛
10- او د ماشومانو له شاقه کارونو راګرځولو طرح؛ هغه طرحې دي چې تراوسه تدوین شوې او د عملي کیدو لپاره یې عملي ګامونه اخیستل شوې دي چې د بیکارۍ په کمښت او ټولنیزې هوساینې په زیاتیدو کې به رغنده ونډه ولري او هیواد به یوې روښانه راتلونکې په لور روان کړي. 
څرنګه چې د افغانستان بیارغونې لپاره د امریکا ځانګړې مفتش (سیګار) په خپل وروستي راپور کې ادعا کړی دی چې د ۲۰۲۱ کال له جولای میاشت څخه تر سپټیمبر پورې تر پنځو لکو وګړي بیکاره شوې دي؛ دا ښکاره کوي چې په ټولنه کې د شته ستونزو او بدمرغیو اصلي لامل امریکا او د هغې متحدین دي.
بیا هم د افغانستان اسلامي امارت هیله من دي چې نړۍواله ټولنه به د وضع شویو بندیزونو په لیري کیدو کې ځانګړې پاملرنه وکړي ترڅو د هیوادوالو ژوند عادي حالت ته راوګرځي او په هیواد کې د بیکاري کچه راټیټه شي.