د وزارت مقام لپاره د دفتر نوی رئیس معرفي شو
جنیدالله عیني په بریالیتوب سره د آزادی سیالۍ د آزموینې له تیرولو وروسته په دویم بست کې د کار او ټولنیزو چارو وزارت د مقام د دفتر رئیس په توګه معرفي شو.
د کار او ټولنیزو چارو وزیر ښاغلي بشیراحمد ته ینج د ښاغلي عیني د معرفي کیدو په مراسمو کې وویل: د دفتر ریاست په سازمان کې د کورنیو او بهرنیو اړیکو د تأمین مرجع ده؛ یو مهم او کلیدي پست دی. ښاغلي ته ینج نوی رئیس ته د مبارکۍ ترڅنګ د یاد ریاست له پخواني سرپرست او د وزات مقام مشاور سیدعبدالوکیل سادات له کړنو او لاسته راوړنو هم ستاینه او مننه وکړه او ښاغلي عیني ته یې په چارو کې د تلپاتی بریالیتوب هیله وکړه.
وروسته؛ جنیدالله عیني؛ د کار او ټولنیزو چارو وزارت د مقام د دفتر نوی رئیس د یاد وزارت د مشرتابه له باور څخه مننه وکړه او پر ګروپي کار یې ټینګار وکړ، همدارنګه یې ژمنه وکړه چې د سازمان له وړاندې تعین شویو موخو په لاسته راوړلو کې به کوټلی ګټور او ارزښتناک ګامونه واخلي.
د یادولو وړ ده چې له دې وړاندې ښاغلي جنیدالله عیني د بدخشان ولایت د کار او ټولنیزو چارو رئیس په توګه کار کړی دی او په هیواد کې شته زیانموندونکو اقشارو ته په رسیدګی کې له ښو تجربو څخه برخمن دی.
