د کار او ټولنیزو چارو وزیر د ترکیې هیواد د همکاریو بنسټ له مرستیال او کواردیناټور سره ولیدل
د کار او ټولنیزو چارو وزیر ښاغلي بشیراحمد ته ینج د ترکیې هیواد د همکاریو بنسټ (تیکا) له کواردیناټور ښاغلي زوهتو چال او د همدې بنسټ له مرستیال ښاغلي عرفات سره په کابل کې ولیدل او په بیلابیلو موضوعاتو یې خبرې اترې وکړې.
په یاده لیدنه کې د کار او ټولنیزو چارو وزیربشیراحمد ته ینج په تیرو دوو لسیزو کې ؛ د ترکیې هیواد او په ځانګړې ډول د یاد هیواد د همکاریو بنسټ (تیکا) مرستو او همکاریو لکه د پلونو، پلچکونو، ښوونځیو، سړکونو، روزنتونو جوړولو او د روزنتونونو د تمویل او تجهیز څخه مننه وکړه، ښاغلي ته ینج وویل: یادې پروژې په کابل، ننګرهار، قندهار، هلمند او شمالي او شمالشرقي ولایتونو کې پلې شوې دي، د یاد بنسټ په مرستو کې د کابل ښار د تهیه مسکن او علاوالدین روزنتونونو ته په ځانګړې پاملرنه شوې ده.
د کار او ټولنیزو چارو وزیر په خپلو خبرو کې له ذهني تاخرسره مخ ماشومانو د ساتلو د مرکز په ملاتړ، ساتنه او مراقبت او په کار او ټولنیزو چارو وزارت کې د هرات معمارۍ په سبک د جومات په جوړولو کې له یاد بنسټ څخه د مرستو غوښتنه وکړه؛ چې د ټیکا بنسټ کوارډیناټور له لورې له خپلو مرکزي مسوولینو سره په انقره کې له مشورې وروسته د همکارۍ ژمنه وشوه.
د تیکا بنسټ کوارډیناټور په ټولو ډګرونو په ځانګړې ډول د یتیمو، کونډو، معلولو، په نشه یي توکو روږدو او نورو زیانموندونکو قشرونو سره د ترکیې هیواد د مرستو او همکاریو دوام خبر ورکړ او د کڼو معلولینو لپاره د روزنیزو پروګرامونو په لاره اچولو کې یې ژمنه وکړه.
ښاغلي چال زیاته کړه: په نږدې راتلونکې به د روزنتونونو نیمګړتیاوې او اړتیاوې مرفوع کړو او د پروان ولایت د روزنتون په جوړولو او د هغه د تجهیز او تمویل لپاره به هم اقدام وکړو.
په پای کې دواړو لوریو په افغانستان کې د دوست هیواد ترکیې په مرستو او همکاریو کې د لازمې همغږۍ په راوستلو او همداشان د کار او ټولنیزو چارو وزارت او د تیکا بنسټ ترمنځ د همکاریو په پراخوالی ټینګار وکړ.
