د سايواک غړو هېوادونو سره د ټولنيزو چارو مرستيال ويډيويي کنفرانس
د ټولنيزو چارو مرستيال غلام حيدر جيلاني د جنوبي آسيا هيوادونو ابتکار سازمان غړو سره د ماشومانو پر وړاندې د تاوتريخوالي اړوند ويډيويي کنفرانس کې خبرې وکړې.
دې ناسته کې د ټولنيزو چارو مرستيال د ماشومانو د پرمختګ پر وړاندې، په ځانګړي توګه د کارګرو ماشومانو ستونزو اړوند خبرې وکړې، و يې ويل: د افغانستان ماشومان يو له زيانمن شوي قشر څخه دی، چې له دې ډلې افغانستان کې ۳.۵ ميليونه ماشومان د کار بازار کې مصروف دي او د خپلو کورنيو د نفقې مسؤليت پر غاړه لري، چې د تير کال په نسبت دغه شميره درې چنده زياته شوې ده.
ښاغلي جيلاني؛ جنګ ، بېوزلي او تيرو دوو کلونو کې کرونا ويروس د ماشومانو پر وړاندې اساسي ستونزې يادې کړې او د سايواک غړو هيوادونو څخه يې د جنوبي اسيا هيوادونو د ماشومانو د ستونزو حل برخه کې د ښې همغږۍ او همکارۍ غوښتنه وکړه.
په دې ناسته کې د سايواک سازمان مشر داکتر رينچور د خپلو خبرو په ترڅ کې د ټولنيزو چارو معينيت کړنو څخه د خوښۍ په څرګندولو سره ژمنه و کړه چې د افغانستان د ماشومانو د ستونزو د حل او لازمو حل لارو سنجولو په موخه به نږدې راتلونکي کې افغانستان ته سفر وکړي.
ښاغلي چوپل زياته کړه چې يونيسف او نورو سازمانونو سره په اړيکه کې دی، څو د افغانستان ماشومانو ستونزو اړوند ښه کار او ستونزو ته يې په ښه توګه و رسيږي.
د ويلو دی، چې د سايواک سازمان د معلوماتو پر بنسټ، ۱۷ ميليونه زيانمن شوي ماشومان له ۵ څخه تر ۱۷ کلونو پورې عمر لري، چې د کار بازار کې پر کار مصروف دي.
