د کار او ټولنیزو چارو وزارت او روپاني بنسټ ترمنځ هوکړه لیک لاسلیک شو.
د کار او ټولنیزو چارو وزارت د روپاني بنسټ سره چې موخه یې د زیانمن شویو سره مرسته او وړکتونونو ستندرد جوړول دي، کار کوي، چې نن ورسره د کړنو او همکارویو لا زیاتوالي په موخه هوکړه لیک لاسلیک کړ.
د کار او ټولنیزو چارو وزیر بشیر احمد ته ینج د خپلو خبرو په ترڅ کې د روپاني بنسټ له کړنو څخه مننه و کړه، و یې ویل، چې د وزارت او روپاني بنسټ کاري برخه تر یوه بریده یو شان ده او د ماشومانو د زده کړې برخه کې د یاد بنسټ فعالیت د کار او ټولنیزو چارو وزارت لپاره یوه ښه تجربه ده.
د دې هوکړه لیک پر بنسټ به د یاد بنسټ کړنې په هیواد کې له بدخشان ولایت څخه کابل او نورو ولایتونو ته هم و رسیږي، روپاني بنسټ به د کار او ټولنیزو چارو وزارت لپاره د ماشومانو یو متخصص ګماري او د ماشومانو برخې علاوه به د میرمنو برخه کې هم همکاري کوي، نوي وړکتونونه به جوړ او د افغانستان د وړکتونو د نصاب نوي کولو برخه کې به همکاري کوي؛ د یاد هوکړه لیک له مخې به موبایل سنتر یا سیار وړکتونونه هم جوړ شي.
د روپاني بنسټ مشر محبت علي د خپلو خبرو په ترڅ کې وویل: موږ اوس مهال بدخشان په ځانګړې توګه واخان ولسوالۍ کې فعالیت لرو او له ۲۰۱۳ کال را په دیخوا شا او خوا ۲۶۰۰ کورنۍ د دې بنسټ له خدمتونو څخه برخمنې شوې دي.
د نوموړي په وینا چې د دې هوکړه لیک له مخې به د یاد بنسټ فعالیت نوره هم پراختیا و مومي.
