افغان ـ کوریا د فني او حرفوي زده کړو انستیتوت څخه د ۴۱۱ تنه شاګردانو فراغت غونډه
دغو فارغانو چې اوو مختلفو (کمپیوتر، انگلیسی، خیاطی، نجاري، برق، ساختماني و نلدوانی) څانګو کې يې شپږ مياشتې او همدارنګه څلور څانګو کې يو کال زده کړې تر سره کړې وې، د يو لړ مراسمو په ترڅ کې د مالي او اداري چارو مرستيال مسعودالله اورياخيل، د وزارت مقام د دفتر رييس سيدعبدالوکيل سادات، د اطلاعاتو او عامه اړيکو رييس محمد يونس صديقي او ځينو نورو ميلمنو له لوري ورته فراغت پاڼې و ويشل شوې.
په همدې موخه جوړه شوې غونډه کې د مالي او اداري چارو مرستيال مسعودالله اورياخيل فارغانو ته د مبارکۍ ترڅنګ وویل: فن او حرفه د کارموندنې او آرامه ژوند یو ښه عامل دی.
نوموړي زياته کړه: د کار او ټولنيزو چارو وزارت تل هڅه کوي، څو د فن او حرفې له لارې هيوادوالو ته د کار زمينه برابره او د بېکارۍ سطحه را ټيټه کړي.
ښاعلي اورياخيل همدارنګه وويل: که څه هم ۱۳۹۹ کال د کرونا ويروس له امله ښه کال نه وه اما بيا مو هم و کولای شول، چې يو شمير ځوانان د فن او حرفې برخه کې و روزو او د کار او ټولنيزو چارو وزارت به ۱۴۰۰ مالي کال کې لا زياتو هيوادوالو ته د فني او حرفوي زده کړو زمينه برابره کړي.
دې غونډه کې د افغانستان د صنايعو او معادن دفتر مرستيال هم خبرې وکړې و يې ويل: فني او حرفوي کارګر د هيواد معنوي پانګه دی، په کور دننه د فني او حرفوي زده کړو شاګردانو روزل موږ د بيروني کارګرو له احتياج څخه خلاصوي. نوموړي همدارنګه د خپلو خبرو په ترڅ کې د کار بازار مطابق د فني او حرفوي کارګرو په روزلو ټينګار وکړ.
غونډه کې د افغان ـ کوریا د فني او حرفوي زده کړو انستیتوت آمر میر جلال الدین هشام هم فارغانو ته مبارکې وویله، زیاته یې کړه: افغان ـ کوریا د فني او حرفوي زده کړو انستیتوت شاګردانو ته د فن او حرفې ور زده کولو تر څنګ د کارموندنې په برخه کې هم هڅه کوي.
هشام زیاته کړه، چې په دې ښوونیزه او روزنیزه دوره کې له اوو (کمپیوتر، انگلیسی، خیاطی، نجاري، برق، ساختماني و نلدوانی) څانګو څخه ۴۱۱ تنه فارغ او نن یې د فراغت پاڼو ویشلو شاهد یو.
د ويلو دی، چې افغان ـ کوريا د فني او حرفوي زده کړو انستيتيوت، ۱۳۸۴ هـ ش کال د دوست هيواد کوريا په مالي مرسته جوړ او د کار او ټولنيزو چاررو وزارت تر چتر لاندې فعاليت لري، چې اتيا سلنه درسونه په کې عملي او د کار بازار مطابق دي او ۱۳۹۹ کال کې ټولټال ۵۵۰ تنه شاګردان له دې انستيتوت څخه د فراغت سندونه ترلاسه کړي دي.
